مـا عليــنـا

نكديه

2008-11-11T09:27:00.000-08:00

هو سؤال واحد

ايه مفهوم الست النكديه ؟

إحنا الناس التانيين

2008-10-28T11:20:00.000-07:00

لفتره اللي فاتت فكرت اكتب كتير والحمد لله مصر مش محتاجه التفكير في موضوعات

عندنا من الموضوعات والكوارث والاحداث مايمكن ان يوضع في موسوعة جينيس

لاكثر البلاد كوارث في العالم وخاصةالفتره الاخيره بقينا تقريبا يوميا

بنسمع عن حوادث وكوارث جديده ولان بشوف ان مجرد الكتابه عن الحدث

هيجعل المدونه اخباريه وده انا مش عايزه واعتقد ان كلنا نقدر نقرا الاخبار

ونقدر نشوف تحليلها من اكثر من موقع واكثر من برنامج واكثر من مدونه

وعلشان كده يمكن انا حابه اسال سؤال في وسط كل ده

يعني تحب نبدا من الاول ولا من الاخر من اول حكم براءه ممدوح اسماعيل

وقطر مرسي مطروح والدويقه

لغاية البنت اللي ماتت لانها فكرت انها تنزل من المترو

ولا الطفل اللي عمره 11 سنه اللي ضحك فانضرب بالشللوت من المدرس

ولا الالف فيلا اللي الحكومه اكتشفت فجاه ان الارض ملكها ولا ولا ولا

وماخفي كان اعظم

والغريب بقي ان كووووووووووول الكوارث دي

وماسمعتش اسم رئيسنا غير مرتين او تلاته

واحده ساعة العفو العظيم عن ابراهيم عيسي

والاخري في الزيارتين الاخيرتين لرئيس وزراء اسرائيل ورئيس بريطانيا

وشفته طبعا يوم اوبريت 6 اكتوبر فرحان وبيسقف

والاخبار مليئه دائما بانشغاله بالقضيه الفلسطينيه ومساعدة اليمن في كوارثها

ساعتها بفتكر نكته بحبها ودايما بضحك عليها

لما دخل واحد فجاه علي ناس معاهم سلاح فوقفوه

وقالو له انت معانا ولا مع الناس التانيين خاف وقال انا معاكم

راحو قايلين احنا الناس التانيين

فهو حاجه من الاتنين يا اما حكامنا هما الناس التانيين

او احنا الناس التانيين

2008-10-25T11:57:00.000-07:00

انا قلت ابتدي اول تدوينه بعد غياب اني اقدم اعتذاري وياريت تقبلوا الورده هديه كبدايه بان مايكونش فيه غياب تاني باذن الله

هـل الجهـل أفضـل ؟

2008-04-19T11:38:00.000-07:00

النهارده حكيتلي الباشمهندسه اللي بشتغل معاها عن كتاب قريته للدكتور خالد منتصر اسمه وهم الاعجاز في القرآن ولأني اعرف نوع كتابات هذا الكاتب وفكره وآراؤه ماعنديش فضول قوي اسال عن اللي كتبه بس لقيتها بتكمل كلام وازاي انها متضايقه جدا لانها شافت ان طريقة الكاتب ورأيه ممكن يهز ثوابت جوه ناس كتير ورغم احساسها القوي برفض الطريق ده لكن وجدت نفسها بتتسائل ليس شك في الاعجاز ولكن بحثت عن كلام علمي ممكن ترد بيه علي كلامه فللاسف مالقيتش جواها الرد وده لانها بكل بساطه ليست عالمه في القرآن او الاعجاز القرآني او حتي العلوم

فلما اخبرت صديقتها كان رايها ان قراءة هذه الكتب غلط من الاساس لانها هتسير تساؤل وشكوك عن اشياء لا نعلمها ولا نتعلمها ولكن هي بداخلنا ثوابت او فطره ومنها مثلا ان القران اعجاز دائم مستمر الي يوم القيامه نكتشف كل يوم اعجاز جديد منها العلمي واللغوي والعلم بكل بواطن الامور ولو تعارض اي شئ والقرآن فلابد ان القران هو الصح والاصح او اننا فسرنا الايه بالطريقه الخطأ هذا ثابت رغم اننا لانعلم اي شئ عن الاعجاز العلمي ولا كيف نفسره ونوضحه وهذه الاشياء او الكتابات ممكن ان تهز الثوابت بسبب كثرة التساؤل ومنطقية الكلام في معظم الاحوال فمن الافضل البعد عنها ولا يكون لدينا الفضول عنها

ولكن هي كان لها راي آخر فهي تري ان تناقض التساؤلات مع الثوابت يجعلنا نريد ان نعلم حتي نتيقن من ثوابتنا وبلك لا يمكن ان نتسائل مره اخري فمثلا عندما قرئت كتاب الدكتور خالد تسائلت فبخثت عن موقع الدكتور زغلول النجار وبدات تعرف ماهو الاعجاز العلمي في القرآن فنهت كل تساؤل من هذه الناحيه وايضا عندما كانت تعمل مع بعض النصاري ومانوا يتقولون علي الرسول الكريم بنقطة زواجه ويصفونه بكلمة انه زير نساء وكثير من الكلام هي لم تكن تعرف كيف ترد ولكن هذا جعلها ان تقرأ عن نساء الرسول وزوجاته فالتساؤل يؤدي بنا الي التعلم حتي نخمد بذرة التساؤل بالعلم

السؤال دلوقتي هل نقرأ ونتسائل وبالتالي نتعلم أم الجهل هنا أفضـل ؟؟؟

متابعة:

أولا متشكره جدا لكل اللي علقوا وجاوبوا علي السؤال وفرحت جدا بتعليقات باشمهندس ما علينا واستاذ عصفور المدينه وشايفه انه كتكمله للموضوع لازم نجاوب علي السؤال وده بعرض التعليقات اللي جاوبت عليه من استاذ عصفور وباشمهندس ما علينا

ماعلينا:

السلام عليكم هو التعلم غير مرتبط بمحاولة الآخرين للتشكيك ॥ واإجابة السؤال ॥ نعم الجهل بما يكتبه المشككين أفضل .. والعلم بالدين أفضل .. والفتن تعرض على القلوب عرض الحصير، فأي قلب أنكرها نكتت فيه نكتة بيضاءوأي قلب أشربها نكتت فيه نكتة سوداء حتى يصير القلب على قلبين: أبيض مثل الصفا لا يضره فتنة ما دامت السماوات والأرضوالآخر أسود لا يعرف معروفًا ولا ينكر منكرًا إلا ما أشرب من هواه।وكل واحد أدرى بحاله أما أن يبعد حتى يتلقى العلم بدينه الذي يحفظه من هذه الفتن أو أنه يدخل في الفتن لو هو شايف نفسه جامد ॥ بس يخلي باله على نفسه :)يعني هي لو عادتها طلب العلم من الأول وبتسعى لكده .. يبقى أظن لها الحق أن تطلع على كتب فيها شبهات عشان ترد عليها ولو كانت من الأول مش بتتعلم .. ووقع في ايدها قدرا الكتاب ده فقررت إنها تكون من الصنف الأول وتستمر في تلقي العلم وتفرغ نفسها له بغض النظر عن الشبهات دي أو غيرها .. فلها أن تسأل وتتعلم أما بقى لو كانت مش طالبة علم وتبحث عن هذه الكتب بزعم إنها كده تتيقن من ثوابتها ولما بيقع في ايدها كتاب بتروح تدور عشان تعرف ترد .. فدا تطبيق لمثل وضع العربة أمام الحصان :)

أستاذ عصفور المدينة:

الحمد لله وصلى الله وسلم وبارك على عبده ورسوله محمد وعلى آله وصحبه أجمعينجزى الله أخي حاتم خيرا على حسن ظنه وإن كنت قد قرأت هذه التدوينة ولم أعلق عليها خشية أن أخوض فيما لا أحسن أما وقد وجبت أقول وبالله التوفيقدلائل الإيمان تتفاوت من إنسان إلى آخر وليس مايسع إنسانا يسع الآخرين فهناك من يزداد إيمانه بالنظر في الاعتقادات الأخرى ومقارنتها والدفاع عن الإسلام وهناك من ربما يقدح هذا الأمر في إيمانه هناك من يسع قلبه الخلاف الذي حدث بين الصحابة وهناك من لايسع قلبه ذلك هناك من يزداد إيمانه بما يسمى الإعجاز العلمي وهناك من لايزداد بذلكعصرنا هذا أصبح الناس فيه يعتقدون أنه ينبغي عليهم أن يتبنوا رؤى مشتركة للوصول إلى كما ل الإيمان وهذا أراه خللا شديدا في منهجية الناس هذه الأيام وهو التنميطلكي تكون مؤمنا لابد أن تسمع تفسير الشيخ فلان أو وعظ الشيخ فلان أو حتى كلام الدكتور فلان في إعجاز القرآن أو العلاج بالأعشاب بل قولوا أيضا لابد أن تسلك المنهج الحركي الفلاني لكي تكون عاملا للإسلام هذه مشكلة مشكلةفالحق أن التنوع بين الناس في الوصول إلى الجنة أمر أصيل في الإسلام بل إن عبد الله بن مسعود كان لا يصوم التطوع لأنه يجعله يقصر في الصلاة وقرر النبي صلى الله عليه وسلم أن الناس يدعون كل من باب من أبواب الجنة وأن أبابكر يدعى من كل تلك الأبوابفلكل إنسان مداخل يقوى بها إيمانه وما يصلح إنسانا لا يصلح غيره وعلى الإنسان وحده وليس على المجتمع أو الجماعة أو النمط السائد على الإنسان أن يكتشف ماهو بابه إلى الجنةأيضا إطلاق اسم العلم أو الجهل على بعض التفاصيل هو أمر ينبغي التدقيق فيه فمثلا الذين شغلوا بالبحث في دلالات وعلاقات الأرقام في القرآن ربما يسمى هذا علما مثلما يسمى السحر علما تماما وأيضا الأبحاث ينبغي أن تأخذ هدفها الحقيقي أولافمثلا هل الغرض من قراءة تفاصيل أبحاث الإعجاز هو إثبات أصل ثبوت القرآن ونزوله من رب العالمين وأصل بعثة النبي صلى الله عليه وسلم وكون كلامه وحيا طيب فمن كانت هذه حقائق راسخة عنده فلماذا يحتاج إلى ذلك هل للرد على ممن لا ينتمون إلى الإسلام طيب هل هو ممن يعملون في هذا المجال الدعوي هل يزداد إيمانه بذلك هل هل هلثم إن هذا المجال أيضا هو من مجالات الوصول لتفسير الآيات وفهم معانيها ولا ينبغي أيضا التعسف في الوصول لمعنى لكل آية وأيضا لابد أن يكون ذلك على منهج صحيح في التفسير بمعنى ألا يتم الاستدلال بالأحاديث الضعيفة أو التعسف اللغوي وقصر معنى بعض الآيات على دلالة معينة رغم إن القرآن يدل دلالات متنوعةطبعا الطرف الآخر والإنكار والسخرية من ذلك هو طبيعة الحياة وجود مثل هذا التطرف والرغبة في الانتشار والصيت على حساب إنكار أي شيء وعدم التفريق بين ما هو ثابت وماليس كذلك هذا الإنكار والتطرف المقابل هو موضة وتقليعة هذه الأيام ولكن أقول أيضا أن هذا لا ينبغي أن يسمى دائما إنكار الثوابت بل لابد أن يخضع الطرفان للتدقيق العلمي وألا يكون شيئا معتبرا من الثوابت إلا إذا وصل إلى هذه المرتبة عن جدارةوللتلخيص والإجابة على السؤالنقرأ ونتسائل وبالتالي نتعلم أم الجهل هنا أفضـل ؟؟؟أقولالأمور رهينة بالحاجة وبالقدرة على العطاء في هذا المجال أو ذاك وفي تحقيق القرب من الله وكان لي مقولةينبغي أن نقيس كل هذه العلوم والأقوال والمناظراتبمقياس القرب من الله والطاعة وإصلاح دين الناسوألا تفقد هذه الوصلة بين العلم والعمل أبداوالله الموفق

قــاعدة عـــرب

2008-03-30T11:42:00.000-07:00

انا عادة مش بحب اسمع خطب السياسيين يعني اول مابسمع ايها الساده والسيدات والحضور الكريم بحس اننا في مسرحيه وكلهم ممثلين بيكدبوا وبيمثلوا علي بعض وعلي المتفرحين وكل واحد عارف ان التاني ممثل ودي كلها مسرحيه بس لازم يكملوا الدور للنهايه حتي لا تكون مؤامرات خلفيه ضده من وراء الكواليس وهذا بالنسبه لكل المناسبات ولكل السياسيين بلا اي استثناء لان السياسه مرادفها التمثيل وساعات تتحول تمثيل بلا ادني سياسه او هدف بس كله بيمثل علي كله وكله بيكذب علي كله فأول ما اسمع اول جمله في الخطاب اقول كذاب واقفل لكن يوم إفتتاح القمه العربيه الحاليه كنت في الشغل ولاني قاعده لوحدي بشغل الراديو وخصوصا إذاعة الشرق الاوسط لان المذيعين والبرامج دايما شغالين ففيه كلام جنبي مش منتبهه ايه اللي بيتقال صوت وخلاص وفجأه انقطع ارسال البرنامج لإذاعه خارجيه قلت خير وبعدها سمعت المذيعين بيتكلموا عن القمه العربيه في دمشق وبتوصف القاعه وبيتناقشوا هل هي جزر القمر (بضمه علي القاف) او القمر (بفتحه علي القاف)

وبدأوا بكلمة بشار الاسد وحواره كله كان علي لبنان وانه كان يتمني ان تأتي لبنان حتي يتوصلوا لتسويه بينهم علي اساس انهم هيصالحوا بعض في قاعدة العرب دي وكل رئيس يهدي النفوس بين البلدي ويقولوا ده احنا اخوات ومالناش غير بعض قومي ياسوريا بوسي راسها يلا يا لبنان خلاص حليب يا لبن وانهم ماعرفوش يعملوا ده الا في مؤتمر رسمي علشان يمسكوها من ودنها اللي بتوجها هه هتتصالحي ولا نفضحك ونقول مش راضيه ومابتسمعيش كلام اخواتك وانتهي الرئيس من كلمته

وجاء عمرو موسي وجاء خطابه في 8 نقط وهي طبعا مصايب الدول العربيه من فلسطين للبنان للعراق لعلاقات الدول العربيه بعضها ببعض والازمات الداخليه والخارجيه للبنان بس نسي يقول انها رغم كل هذه المشاكل لسه بتتمتع بروح المرح والهيافه ولاتزال ستار اكاديمي للموسم الخامس والسنه الخامسه علي التوالي علي ارض لبنان وانهي كلمته بان هذه النقاط مطروحه من القمه الماضيه ولم تحل الي الان ولن تحل في المستقبل القريب ولا البعيد وطبعا مش نسي يشيد بجهود جامعة الدول العربيه وفضلها العظيم علي كافة الدول يعني ان خير الجامعه علي الدول ومغطيهم ورغم هذه الجهود الكبيره برضه مغيش تقدم ولا مشكله اتحلت كان ناقص يقول انا مش عارف اعمل ايه انا تعبت وفاض بيا ومفيش فايده فيكو انتو عرب هتفضلوا زي ما انتوا

وجاء معمر القذافي وجاءت كلمته بمنتهي الصراحه وجاب من الاخر انه مفيش فايده ولسان حاله بيقول انا مش عارف انتوا جايين ليه احنا مش بنتفق ولا هنتفق وده كله كلام فارغ احنا مش بنحب بعض ولا ناويين فمفيش فايده

ولغاية هنا والاذاعه الخارجيه في الشرق الاوسط خلصت وبعد ماسمعت كل الخطب دي عرفت اننا كسياسيين عرب فاشلين حتي في التمثيل ومالناش غير ربنا لانه علي راي القذافي مفيش فايده

الفـالنتيـن وأشيـاء أخري

2008-03-01T12:07:00.000-08:00

الفالنتين أو يوم الحب هو كان يوم 14 فبراير انا ما بعرفش انه قرب الا لما أشوف الحياه بقت حمرا فجأه بسأل بقي هو

امتي بالظبط وعلي فكره كل سنه أسأل نفس السؤال مابحفظش أو علي الأقل مش بحاول أركز هييجي امتي وقرب ولا لا

وفيه حاجه كمان بتخليني أتأكد إنه قرب من الرسايل الدعويه والمواضيع عن حرمانية الاحتفال بهذا اليوم وأدله بتتقال

كل سنه وطبعا الشباب والشابات المسلميم وفيه منهم كتييييييير بيصلي وبيسمع وبيشوف الادله دي وبرضه بيحتفل

وبيشتري هدايا ده فيه محلات بتعيش السنه كلها علي ايرادات اليوم ده زي محلات الهدايا والورد والشيكولاته وكل سنه

تطلع اختراعات لأشكال الهدايا والناس بتسمع حكم الدين ويقولوا جمله واحده احنا لو دورنا علي حياتنا وبصينا علي

الحلال والحرام هنلاقيها معظمها حرام وبعدين حرام ليه هو كل حاجه حرام يوم حب يوم أم يوم ميلاد كله حرام وكلهم

حابين حالة الاهتمام اللي موجوده بين الناس في الايام دي وبتلاقي دايما مبرر يريح ضميرها من ذنب الحرمانيه فمنهم

اللي بيقول انه مش مقتنع ان الاسلام يحرم حاجه بتقرب الناس من بعض ولو يوم في السنه ده ضد فطرة الالهيه

للانسان ومنهم اللي مقتنع ان الكلام ده خاص بفئه معينه وهي المتشددين والمتعصبين فقط وهكذا فنحن دائما في كل عام

نبدأ عن الكلام عن أدله تثبت حرمانية مثل هذه الاحتفالات ولكن لا أحد يري ولا يسمع وإن قرأ أو سمع لا يريد أن يفهم

حتي لا تضيع فصته بالاحتفال باليوم الذي يظن انه يشعره بأنه محور إهتمام الجميع وأنا أعتقد ان هذا الشباب يحتاج

خطاب من نوع آخر حتي يفهم حكمة الاسلام من هذا الأمر فالسؤال لماذا حرم الاسلام مثل هذه المناسبات والاحتفال بها

؟؟؟ فجوهر الاسلام يدعونا دائما بالاهتمام بكل من حولنا في كل أوقات العام وليس ليوم أويومين فقط في العام فالأم مثلا

لايكفيها الاهتمام ليوم واحد فقط في السنه وان لازم ما تكونش علاقاتك بين اللي حواليك اساسها حب وموده وليس رد

الجميل او الهديه او مصالح وكل ما تزيد مصلحته تزيد هديته وان الحب بين الناس والموده مش شئ مادي بنقيسه علي

قد هديته وثمنها وان لو انسان نسي التاريخ ده ما يبقاش شخص وحش او بيكرهك لمجرد انه نسي اسباب كتييييييييييير

قوي موجوده في جوهر اسلامنا تمنع احتفالنا بهذه الايام وان الاسلام لم يمنعنا ابدا بالاحتفال والفرحه فجعل لنا عيدين

يجتمع فيها المسلمين جميعا علي فرحه واحده

ســلمي

2008-01-12T11:01:00.000-08:00

بســم الله الرحمـن الرحيــم

طبعـا انا بقالي فتره أبتدي كل مدونه بإعتذار عن غيابي وعن تقصيري ناحية المدونه وأنا ماعنديش عذر غير إني عندي حاله من البعد عن النت عموما مش قادره أكتب أي حاجه ولو فتحت بحب أستمتع بقراءة مدوناتكم وفعلا تفاعلكوا واحشني جدا إدعـولي وإن شاء الله أرجع أكتب تاني

السؤال دلوقتي أنا جايه أكتب عن إيه

أنا ماعنديش موضوع أنا عندي خبر أو حدث مفرحني قوي وحسيت إني عايزه أقولكم وتفرحوا معايا

الخبر هو العنوان سلمي

سلمي هي أحدث مولوده في عيلتنا بنت أخويا الكبير

ملاك مايغرفش أي شئ عن الدنيا ولا نوبها ولا قسوتها

تخيل متعتك وإنت شايف ملاك

ربنا يخليهالنا ويحميها لأبوها واموها وتكون الخلف الصالح ياااااااااااااااااارب

أنا هوريكوا صور سلمي بس أمانه عليكم كل اللي يشوفها يسمي الأول

ويقول بسم الله ما شـاء الله

وآدي الصــور

عمل المراه

2007-11-29T11:34:00.000-08:00

اولا بتاسف عن انقطاعي الفتره اللي فاتت دي عن النت عموما لكن ما باليد حيله وبشكر كل الناس اللي ردوا عليا في

التدوينه اللي فاتت جدا

انا بفتح الموضوع ده وانا مش قادره اكون راي ثابت عنه

فحقيقه ان المراه تعول أكثر من 25% من الاسر المصريه
وحقيقه ان العمل شئ ممكن يجعلها تشعر بحياه مختلفه عن واقع انتظار عريس
جعلني لا اعلم

لان هذه الحقائق تقف في مواجهه شعور داخلي ان العمل ومتطلباته والسوق لا يتناسب مع المراه بل يجعلها في مكانه ليست تنتمي اليها بفطرتها

انا اعمل الان منذ شهرين في شركه صغيره

ورغم ان تعاملي معظمه مع زوجه صاحب العمل ورغم ان كل زملائي الشباب في العما لا يتواجدوا في الغالب في المكتب يعني احتكاكي بيهم قليل وفي اضيق اضيق الحدود

ورغم ان العمل بينه وبين بيتي ربع ساعه مشي واخرج منه قبل المغرب بساعه ورغم ان تعامل كل من في المكتب بمافيهم صاحب المكتب في منتهي الذوق والاحترام ووقت الصلاه اقوم لاصلي ومفيش ادني مشكله

رغم كل هذا ورغم ان كل الظروف تجعل اي انسان مبسوط ولكني لا اشعر بها بل كل يوم يزداد داخلي شعور باني لا انتمي الي سوق العمل وان هذا ليس مكاني رغم اني والحمد لله اقوم بعملي علي اكمل وجه ممكن بشهاده الجمسع ولكن لا اعلم مصدر هذا الشعور بعدم الارتياح

ولو تركت العمل ماهو البديل لدي بل لدي اي امراه ؟؟؟؟؟

Mosh Aarfa Akteb Araby

2007-11-21T07:36:00.000-08:00

Yareet Law Had Yeaaraf Yeoaly Aaraf Araby Ezay Ala El jehaz

هي

2007-10-20T11:11:00.000-07:00

هي بنت مصريه وجدت دنياها تسير في كل اتجاه من حولها وهي دون اراده منها تسير معها

اتولدت شافت امها في البيت دنيتها هي البيت عايشه عشان كل اللي فيه ماعدا هي

عايشه بيهم وعشانهم

كبرت وهي دي الصوره اللي تعرفها عن هي انها الزوجه والام

وشايفه كل شئ حواليها بيوجها ناحيه هدف واحد الزواج وانها بدونه لا تساوي شئ

والدراسه وسيله للحصول علي عريس افضل

يعني الدكتوره بتتجوز دكتور

والمهندسه تتجوز مهندس

او علي الاقل هتحصلي علي عريس مؤهل عالي

ومع الوقت اصبحت الجامعه وسيله واضحه للحصول علي عريس

واصبح الطبيعي هو الخروج من الجامعه بزميل يصبح عريس للمستقبل

و المجتمع رغم انه وضع هذا الهدف لكل هي

نسي ان يعلمها كيفيه الوصول لهذا الهدف

فلم يضمنوا لها الحصول علي هذا الهدف

لانه ليس بايديهم ولا بيدها بل بيد رب العالمين

هو الوحيد العالم بالغيب عالم بالنصيب ومتي وكيف ستحصل عليه

فتجد نفسها لم توجد لنفسها حياه وشخصيه ولا بيدها ان تحقق الهدف الموضوع لها

يعني لا طالت بلح الشام ولا عنب اليمن

وعندما تفوق من الحلم الذي وضعه كل من حولها لكل هي

تحاول تبحث عن نفسها او عن طريقه للحصول عن ضل راجل

في احد المنتديات عملت موضوع سالت فيه سؤال محدد

الزواج غايه ام وسيله ؟؟؟؟؟

:وردت احدي العضوات بالايه الكريمه

"قل ان صلاتي ونسكي ومحياي ومماتي لله رب العالمين"

كل رمضان وانتم بخير

2007-09-11T11:22:00.000-07:00

كل رمضان وانتم بكل خير

حابه بس الفت نظركم لحاجه

هو ان كلنا بنبدا رمضان بهمه عاليه وبحماس للطاعه والعباده

والحماس ده بيقل شويه بشويه

وينتهي رمضان بهمه اقل مما بدانا بها

فمهم قوي ان احنا نجدد نيتنا من هدفنا من رمضان كل ليله

ونحاسب انفسنا علي افعالنا كل ليله

وننوي علو همتنا الليله القادمه عن الليله السابقه

وهذا حتي نضمن اعلي همه في العشر الاواخر وليس العكس

وكل عام وانتم بخير وهتوحشوني طيله هذا الشهر الكريم

وارجو من الجميع الاخذ بنصائح الاستاذ عصفور المدينه في نصيحه رمضان

ومرحب شهر الصوم لمدونه اهل الجنه

واراكم بعد عيد الفطر باذن رب العالمين

واتمني للجميع رمضان افضل من رمضان السابق

وبلوغ ليله القدر يارب العالمين

حدث في مثل هذا اليوم

2007-09-04T11:15:00.000-07:00

في مثل هذا اليوم من 23 سنه

كان يوم مولدي

ماما قالتلي انه كان يوم وقفه عرفه

احنا في العيله عندنا مش مهتمين قوي بالمناسبات اللي زي دي

يعني يبقي كويس قوي لو افتكر وقال كل سنه وانتي طيبه

وده مش منطلق اننا شايفين ده حرام

لا الحكايه ابسط

لان انا بابا الله يرحمه وماما ناس بسطاء جدا

يعني انا فاكره اننا لسه مكتشفين تاريخ ميلاد امي قريب جدا

لما وجدنا شهاده ميلادها في وسط الاوراق

وعرفنا انه شهر 2

رغم ان انا طول عمري اعرف انه شهر 6

المهم ان احنا اتعودنا علي كده

وماكنتش باخد بالي قوي

وممكن يفوت عيد ميلادي وافتكر بعدها بشويه

لما وصلت لاعدادي وثانوي

ابتديت اشوف ناس كتير

بتهتم بالمناسبات دي

وابتديت اكتشف ان فيه عيد جواز وناس كمان بتهتم بذكري الخطوبه

ده غير الفالنتين

بصراحه كنت بحس انه جميل ان اللي حواليك يفتكروك

ويقولو دعوه حلوه

ومش مهم الهديه بس احساس ان حد افتكر مناسبه خاصه بيك اكيد احساس جميل

مع الوقت ابتديت اعرف ان الحب والاهتمام بين الناس اكبر بكتير

من كلمه في مناسبه ايا كانت مهمه

يعني زي ماذكرت قبل كده

في عيلتنا الصغيره عمري ماشفت والدي الله يرحمه

بيجيب هديه لماما في اي مناسبه من المناسبات دي

لكن لما اشوف بابا الله يرحمه ازاي كان الشئ الوحيد اللي يزعله من اي حد قوي وينرفزه

ان ماما تكون زعلانه او شايله هم حاجه

يحاول علي قد مايقدر يحل اي مشكله عشان هي ماتشيلش هم

بيدور علي الشئ اللي يسعدها قوي ويعمله

ساعتها افهم ان الحب والاهتمام بين الزوج والزوجه اكبر من علبه حمرا في الفالنتين

لما اكون تعبانه واخويا الكبير عند حماته اللي يبعد بيتها عن بيتنا اكتر من ساعه ونص بالعربيه

وماما تتصل بيه يقولها انا جاي روحوا عند الدكتور وانا هحصلكوا

ويتصل بيا كل خمس دقايق علي الموبايل يعرف عملنا ايه

واول ماييجي عند الدكتور مراته تقولي كان بيسوق بسرعه وقلقان عليكي جدا

واول ماشافني ابتسم وقعد يهزر عشان ينسيني اي تعب

ساعتها اعرف ان رابطه الاخوه اكبر من اي كلمه في مناسبه

ارجع اقول انه جميل انه حد يفتكر مناسبه لشخص قريب منه

ويسعده انه فاكر ومهتم

لكن مش معني انه نسي انه غير مهتم

لان الاهتمام والحب اكبر بكتير من كلمه في اي مناسبه

عدنا

2007-09-01T16:24:00.000-07:00

اسفه عن انقطاعي كل الفتره دي

عن الكتابه وعن التعليقات

بس انا كنت متابعه بالقراءه معظم اللي اتكتب الفتره اللي فاتت

واكتشفت عوالم اخري في مدونات اخري

منها اللي صدمتني بجرئتها الزايده

ومنها اللي عجبني حماسها

وعجبتني قوي قوي بوستات الاستاذ عصفور المدينه

عن رمضان

وناويه اخد بنصيحته في تحضير برنامج مفصل لرمضان

للاستفاده القصوي في كل ثانيه في هذا الشهر الكريم

وكل سنه وانتم جميعا بخير وبافضل حال

ويكون رمضان السنه دي بدايه جديده لمجموعه من الطاعات

سبب غيابي الفتره اللي فاتت مجموعه من الظروف

منها عائليه ومنها نفسيه ومنها الكترونيه

واصعبها الظروف النفسيه

ودلوقتي بحاول اجمع نفسي وابنيها من الاول

وهستغل رمضان في ده ان شاء الله

وياريت تدعولي

انا حبيت اسلم عليكم الاول

واقولكم اتنظروني

مع بوستات جديده

ان شاء الله

داري علي شمعتك تزيد

2007-08-19T11:00:00.000-07:00

نجحت اوعي تقول او قول يعني الحمد لله

اتخطبتي اوعي تقولي او قولي عريس اي كلام

اتجوزتي اوعي تقولي او قولي بلا جواز بلا نيله

حامل اوعي تقولي او قولي ده انا تعبانه والحمل تاعبني وبموت

اشتغلتي اوعي تقولي او قولي ده الشغل مطلع عيني واشتمي في اصحاب الشغل

جبتي شقه جديده اوعي تقولي او قولي دي شقه في منطقه زباله ومش متشطبه ودفعت كل اللي حيلتي

وهكذا وهكذا وهكذا

تتفنن فتيات وسيدات المجتمع المصري بعدم وصول اي خبر سعيد لشخص اخر

حتي لو كان اقرب المقربين ليها

داري علي شمعتك تقيد

وعين الحسود فيها عود

وتبدا حاله الرعب والفزع ان حد يعرف سر القنبله الذريه

قصدي الفرحه الاسريه في اي بيت مصري

ولو حد عرف من بره وييجي يمسك حد من البيت يقرره

ويبقي البيت كله موصي ماتقولش لحد

وتبقي بين نارين

يا اما تقولي وتستحملي اللي هيحصلك في البيت

او كاتقوليش ويبقي شكلك وحش قوي قدام اللي بيسال

لان كده كده مفيش حاجه بتستخبي

وهو بيسال عشان يمتحنك خايف مني مش هتقول

ولا مش خايف

وتبدا معركتك داخليا اقول ولا ما اقولش وتبحثي عن اي جمله تجعل الاجابه عايمه

يعني لا تاكدي ولا تنفي

يعني الحمد لله ربنا يسهل ما اعرفش احتمال

كلام من هذذا النوع

ولما توصلي البيت بعد سؤال المقرراتي

يبدا السؤال طيب هو عرف منين

يا ساتر هو مين اللي قالها دي ؟؟

ويبدا الشك ينتشر في وسط الاسره

ياتري مين الخاين

اللي ممكن يكون من غير قصد وبحسن نيه قال

الويل له الويل له

وبعد ذلك يتحول كل اهل البيت الي خبثاء

يبحثون عن اجوبه جهنميه لكل سؤال بعد انتشار الخبر السعيد

وبهذا تتحول كل مناسبه سعيده الي حرب بارده

يبدا كل سائل ان يتمحص ويفهم اللي ورا السطور

وداري علي شمعتك تولع في البيت كله

عبد الله

2007-08-11T04:52:00.000-07:00

عبد الله

شخص غريب وحتي ما اعرفش ان كان عبد الله ده اسمه

ولا وصف يقوله علي نفسه فانا عبد الله

عبد الله شخص قوي البنيه

تعدي عمره الاربعين عاما

يمسك في يده عصا سميكه يستند بها رغم انه من الواضح انه لا يحتاج اليها

كثيف شعر الذقن والشارب

يرتدي جلباب طاقيه

يكلم كل الناس انا عبد الله

بحب الله وبحب الرسول

ربنا قال ان كاسيات عاريات يروحوا النار

شوفوا البنات دلوقتي عريانه

فين ربنا

واتكلم شويه عن قوم لوط وقوم موسي

وشعرت به كالببغاء سمع كام محاضره دينيه

وبيردد من كل محاضره كلمتين

وينتهي ان الناس تتاثر وتعطيله قرشين

ويستخدم هذا الكلام في حياته اليوميه يركب مواصلات يقول الكلمتين

وياخد القرشين

وطبعا السواق لازم يبقي عنده دم وماياخدش اجره

ولو صمم ياخد يبقي اي حد شهم من الركاب يدفع

لانه عبد الله

واصبح الدين هو وسيله عبد الله للشحاته

رغم انه طول بعرض بارتفاع

ولاننا شعب نموت في اللي يضحك علينا

هيفضل موجود عبد الله

ولنا الله

ماعلينا

2007-07-31T07:45:00.000-07:00

ماعلينا

هو ان كل شئ يساوي لاشئ

هو ان تفقد قدرتك علي الدهشه رغم كل ما يحدث

هو شعار ما باليد حيله وادي الله وادي حكمته

هو ان تضرب كف بكف وبعدين تقول يلا قدر الله وماشاء فعل يعني هنعمل ايه

هو ان يكون بداخلك بركان من الكلام ووقت احتياجك لحرف تقوله تبحث عنه فلا تجده

هو عندما تكتشف ان كل ما حولك هو عباره عن فيلم سخيف وحتي ابطاله مش قادرين يكملوا الدور للنهايه

هو عندما تكتشف ان كل ما تملك عباره عن لسان كتير بيبقي اخرس مراعاه لكثير من القيود والتقاليد والعرف والجبن

هو ان تجد كل ماهو صحيح سلبي حركته بطيئه واخرس

وان تجد كل خطا ايجابي سريع وصوته عالي

هو ان تكتشف انك ضعيف ومقاومتك لكل شر داخلي وخارجي ضعيفه فتستسلم لشيطانك وشهواتك وانت بتبرر كل شئ بانك بشر وضعيف رغم ان هذه الكلمه حجه عليك وليس لك لان كل ضعيف لابد ان يتمسك بالقوي الرحيم لابد ان يعلم انه اصغر واضعف من ان يخالف امر ربه وحكمته

هو الاحساس بانعدام المسئوليه عند معظم الشباب والشابات

هو ان تري المصلحه وتبحث عن مستقبل من باب خلفي وتقول هي جت عليا

هو غياب الوسطيه اللي هي اساس اسلامنا الجميل وبقينا بين متشدد والمبسط لكل الامور

هو ان تكون القرابه وصله الدم حبر علي ورق بين اشخاص خايفين من بعض بدل ما يخافوا علي بعض

المنطقه الرماديه

2007-07-18T16:07:00.000-07:00

السلام عليكم ورحمه الله وبركاته

انا شايفه الحياه ازاي

هحاول اصورلكوا الصوره وياريت اي حد شاطر في الجرافيكس يحاول ينفذها

شايفاها طريقين

طريق

مضئ بنور ابيض ساطع شايفاه كل الناس

وعارفه طريقه كويس وعارفه انه طريق الخير

الطريق اللي هيوصلهم للجنه

ولكن مش عارفين يوصلوا له
او مش كلهم بينجحوا انهم يوصلوا ليه

وطريق تاني مظلم

ملئ بكل الشهوات والمعاصي في اخره جهنم

كلنا عارفين انه طريق شر

وطريق ابليس وشياطينه

انه الطريق اللي بيوصل للجحيم

وبالرغم من كده مشدودين ليه

لاننا بشر انفسنا اماره بالسوء

وبنسمح للشياطين تضحك علينا

وبين الطريقين طريق باللون الرمادي

مزيج بين النور والظلام

يشتد سواده كلما اتجهنا الي طريق جهنم

ويشتد بياضه كلما اتجهنا الي طريق الجنه

واعتقد ان معظمنا واقفين في هذه المنطقه

نتشد شويه للطريق المظلم

وفجاه نفوق ونشوف النور ونحاول نرجع لطريق الجنه

وتجرنا انفسنا وشهواتها والشياطين الي الطريق المظلم مره اخري

وهكذا نتارجح بين النور والظلام دائما في هذه المنطقه

هي دي نظرتي للحياه عموما

ودائما بسال سؤال

كيف الخروج من المنطقه الرماديه
الي طريق الجنه ؟؟؟؟

ام اننا خلقنا لنحاول الوصول اليه

ولانعلم ابدا هل وصلنا

الا يوم القيامه

وساعتها سنحاسب علي مدي قربنا منه

وهل المسافه اللي وقفنا فيها لحظه وفاتنا اقرب لطريق الجنه او لطريق جهنم؟؟؟؟

هو السؤال اللي اجابته من خلال الحساب

يا اما تدخلنا الجنه او تدخلنا النار

ان الله جميل يحب الجمال

2007-07-08T10:46:00.000-07:00

اول مره سمعت الجمله دي

كان في اعلان لبرنامج البيت بيتك

وكانوا جايبين لقطه لهيفاء وهبي وهي بتقول ان الله جميل يحب الجمال

بمنتهي الفخر والثقه

شئ مستفز جدا

لما يتقال جمله زي دي معناها في منتهي الجمال ويبقي المقصود منها اننا نبرر سوء اخلاقنا باي كلام وخلاص حتي لو مش فاهمين معناه

في نفس الوقت كنت ساعتها بقرا ف كتاب قبسات من الرسول لمحمد قطب وهو بيشرح هذا الحديث

عن عمر بن الخطاب رضي الله عنه قال : " بينما نحن جلوس عند رسول الله صلي الله عليه وسلم ذات يوم ا طلع علينا رجل شديد بياض الثياب شديد سواد الشعر لايري عليه اثر السفر ولا يعرفه منا احد حتي جلس الي النبي صلي الله عليه وسلم فاسند ركبتيه ووضع كفيه علي فخديه وقال : يا محمد اخبرني عن الاسلام . فقال رسول الله صلي الله عليه وسلم : الاسلام ان تشهد الا اله الا الله وان محمدا رسول الله وتقيم الصلاه وتؤتي الزكاه وتصوم رمضان وتحج البيت ان استطعت سبيلا . قال : صدقت . فعجبنا له يساله ويصدقه . قال : فاخبرني عن الايمان . قال : ان تؤمن بالله وملائكته وكتبه ورسله واليوم الاخر وتؤمن بالقدر خيره وشره . قال : صدقت . قال : فاخبرني عن الاحسان . قال : ان

"تعبد الله كانك تراه فان لم تكن تراه فانه يراك

الاحسان هو ان تحسن صنع الشئ

اي تحبه فتتقنه فتتعود صنعه باتقان اي تحسن صنعه اي تصنعه بدقه وجمال

والاحسان في الحديث جاء بعد الاسلام والايمان

فنجد الاسلام هو الخطوه الاولي

وهو ان تعترف بالشهاده ان لا اله الا الله وان محمدا رسول الله

ثم تبدا بالتكليف اللي علي كل مسلم وهي اركان الاسلام بعد الشهاده

الصلاه والزكاه والصوم والحج عند الاستطاعه

وثاني خطوه هي الايمان

وهو ان يدخل الاسلام قلبك فتؤمن باليوم الاخر

فتعمل كل عمل يقربك من الجنه ويبعدك عن النار

وقبل ان تقوم باي عمل او تقول اي كلمه تفكر هل ستقربك من الجنه او تقربك من النار

ثم اعلي المراتب وهي الاحسان

الاحسان ان تعبد الله كانك تراه

ياااااااااااااااااااااااااااه

تخيلوا هذا النوع من العباده

لا ما تتخيلوش بس ولكن ابدؤا فعلا في تنفيذ هذه العباده

ان تفعلوا كل شئ العبادات والعادات

وان تروا الله

اكيد قبل ما تعملوا اي عباده او عاده او تفكروا اي فكره هتحرصوا انها تكون في منتهي الاتقان

والجمال لترضي رب العالمين

اي ستحسن عمل كل شئ في حياتك

طيب وليه ما نبداش فعلا نعبد الله كاننا نراه

فان لم نكن نراه فهو يرانا واعلم بنا منا

فالله جميل يحسن صنع كل شئ خلقه

تامل في خلق الله سبحانه وتعالي

وتسائل

لماذا مثلا خلق كل هذه الانواع من الورود

بكل هذه الاشكال والالوان

وسبحان الله الذي يجعل من البذره نبته جميله

بل وتختلف باختلاف الارض اللي زرعت فيها

لماذا خلق البحار بهذا الجمال

لماذا خلق السماء والجبال والالوان بكل هذا الجمال

ابحث في اي مكان تجد ان خلق الله في الطبيعه علي فطرتها

قبل تدخل الانسان فيه كان جميلا

بل في منتهي الجمال

لانه لايخلق شيئا عبثا

بل يخلق كل شئ حسنا وجميلا

ولذلك يحثنا دائما والرسول الكريم

علي الاحسان

ان الله جميل ويخلق كل شئ جميل

فحاول دائما ان تصل للاحسان

فتعبد الله كانه يراك فان لم تكن تراه فهو يراك

حتي تفعل كل جميل يرضي عنه ويحبه رب العالمين

خارج القاهره

2007-07-06T09:07:00.000-07:00

السلام عليكم ورحمه الله وبركاته

اولا اسفه اني اتاخرت علي المدونه شويه

بس خدت اجازه شويه

اولا الاجازه كانت في الاول غصب عني

يعني مصيف تبع شغل اختي

لمده اسبوع

وانا لا بعرف اعوم ولا هنزل البحر

فهروح اعمل ايه

نكديه من يومي

المهم امي غصبت عليا

واخويا قعد يتحايل عليا

المهم سلمت امري لله

ورحت

كان المصيف لمده اسبوع في مرسي مطروح

وقبل ما اروح

كل ما اقول لحد انا رايحه مرسي مطروح

يحكيلي عن مناطق وشواطئ جميله

فقلت اروح اتامل في خلق الله شويه

واهيه فرصه اريح دماغي من كله

المهم كان سفر في الاتوبيس

لمده 7 ساعات

لكن البلد بجد جميييييييييله

وكل ما اروح مكان

اقول سبحان الله الذي ابدع في خلقه

فعلا ربنا سبحانه وتعالي جميل

لا يخلق الا كل جميل

المهم اني الحمد لله

رجعت الي القاهره امبارح

واول ما دخلت القاهره

كان نفسي ارجع تاني للهدوء وللجمال والنضافه والتامل

وماما قعدت تقول ايه الزحمه دي

فقلتلها هي دي مصر يا عبله وانا بضحك

كان اسبوع جميل

ودلوقتي عدنا للقاهره وللمدونه مره اخري

وقريبا مع بوست جديد

ان الله جميل يحب الجمال

انتظرونا

اول تاج

2007-06-24T06:17:00.000-07:00

الدكتوره ما عليها قررت تكون صاحبه السبق في اول تاج في المدونه

يعني التاج ده ما عليني تماما

المهم انا عايزه اعرف انا هجبت كام بعد ما اجاوب درجه من 100 مثلا

واقسم بالله العظيم اني ساكون صريحه والله علي ما اقول شهيد

بسم الله نبدا

انت مين ؟؟

(جنه(بس ده مش اسمي الحقيقي

مين اكتر ست اشخاص بتحبهم ؟؟؟

اشمعني سته صحيح انا هعتبر العيله كلها فرد واحد واصحابي وبنات خالتي كلهم دول بقي يعملوا شعب كفايه كده

هل انت سعيد ؟؟

حاليا الحمد لله ساعات بيمر عليا فترات زي اي انسان ببقي مش طايقه نفسي وانا الكابه عندي بزياده حبتين بس دائما فتره الاكتئاب دي بتيجي لما ببعد شويه بشويه عن ربنا يعني الشيطان يضحك عليا شويه ابعد ما احسش بالرضا اكتئب احاول اتغلب عليه برجع لطبيعتي وهكذا

لو اجتمعت مع حسنى مبارك فى مكان واحد هتعمل ايه ؟

انا نفسي اشوفه وجها لوجه عشان اساله سؤال واحد بيدور في دماغي كتير هو ازاي بينام بالليل منين بيجيب الامان وراحه الضمير اللي يخلوه ينام؟؟؟

لو معايا مليون و نص اعمل ايه ؟؟؟

اول حاجه هطلع ربع مليون لله بس مش في مكان واحد في اوجه كتير

تاني حاجه هشتري شقه لاخواتي الاتنين الصبيان وهدي مبلغ لاختي

والباقي هجيب هعمل مشروع بتمناه وهو مطبعه ومكتبه

ولو فضل فلوس هجيب عربيه

يعني هجيب حاجات كتير هاتيهم انتي بس وانا هتصرف ما تقلقيش :)

بتحب مصر ؟؟

كتيييير بحس اني بكرهها بسبب كوارث او مصايب بتحصل واقول اول ما تيجي اي فرصه اني اهاجر همشي وانا مبسوطه ومش هرجع تاني لكن اول ما انزل الشارع وابص في عين الناس الطيبه احس بالروح المصريه اللي صدقيني مش موجوده في اي بلد في العالم حتي البلاد العربيه وده بشهاده شهود اول ما افتح الحنفيه واشرب ميتها حتي لو كان فيها تلوث اقول الحمد لله اول ما اسمع اغنيه عن مصر بحس قلبي فرحان واقول بكره احسن واعرف واتاكد اني بعشق كل شئ في البلد دي رغم كل شئ

انت مسلم ؟؟

الحمد لله رب العالمين مسلمه

ودي نعمه كبيييييره كتييييير مش حاسس بيها لاننا اتولدنا مسلمين

وتحس الفرق ده لما تشوف واحد اتولد مسلم وواحد اسلم بعد ما كبر التاني بيحس بالنعمه وبيشكر ربنا كل يوم عليها

اما الاولاني مش حاسس بيها

ليه ؟؟

كنت زمان زي ما قلت في الاجابه اللي فاتت مسلمه لان في شهاده الميلاد مكتوب الديانه مسلمه وده طبعا تبعا لان والدي ووالدتي مسلمين لكن الحمد لله دلوقتي بقرا وبفهم وبسمع كتير عن ماهيه الاسلام وازاي رب العالمين قال

(لسيدنا محمد في الايه الكريمه ( اليوم اكملت لكم دينكم واتممت عليكم نعمتي ورضيت لكم الاسلام دينا

صدق الله العظيم

الايه دي اعظم دليا علي عظمه هذا الدين وكفايه ان رب العالمين ارتضي لنا ان نكون مسلمين

مين اكتر شخصية متقدرش تستغنى عنها ؟؟؟

والدتي

ايه اكتر موقف محرج ؟؟

مش فاكره موقف محدد حاليا بس انا شخصيه نسايه جدا وكتييييير شخصيات بيكلموني واقعد اتكلم معاهم وانا مش فاكره مين وبيتكلموا معايا بالطريقه اني اعرفهم كويس وببقي نفسي اسال انت مين وبتكسف من نسياني ده دايما

الامنية اللى اتمنا تحقيقها ؟؟

نفسي قوي واتمني ان ربنا سبحانه وتعالي ينور لي الطريق اللي اقدر بيه ادخل ولو جزء من السعاده علي كل بيت مسلم

ونفسي يكون بابا الله يرحمه توفي وهو راض عني

والامنيات كتير بس كفايه دول دلوقتي

التاج باه يتمرر لمين ؟؟؟؟

لمدونه نويت اكوم مستقبلي بتاعت امنيه

ومدونه خليك في حالك لرضوي

نصف ايمان

2007-06-15T15:41:00.000-07:00

(اقتباسا من مقدمه كتاب (قبسات من الرسول

لمحمد قطب

يقول:ان ابرزسمه في الدين الاسلامي هو انه دين الظاهر والباطن

علي حد سواء

لا يرضي ان يكون الظاهر نظيفا والباطن غير نظيف فيصبح رئاء الناس

ولا يرضي ان يكون الباطن نظيفا ولا صدي له في الظاهر فيفقد مهمته ومعناه

ولكن هل هذا يطبق في الواقع

ام اننا نرضي ببعض الاحيان بنصف الايمان فقط

اما ظاهره او باطنه

فنجد بعض المتدينين المتمسكين بالنقاب او الجلباب ولكن للاسف

باطنهم مختلف فيقوموا بتشويه صوره الاسلام فتصبح الصوره ان المتدين متعصب لا يتفاهم لا يضحك

والبعض الاخر نجد انه اخذ النصف الباطن من الدين

فاصبح يتحدث عن الاخلاق ونجدهم اصحاب فكر واخلاق عظيمه ونفخر كثيرا بهم

ولكن لا نشعر حقيقه انهم يمثلون الدين الاسلامي

لما اخذوه من مظهر مختلف

واري ان الاعلام ساهم كثيرا في ترسيخ هذه الصوره

فنجد مثلا فنان مثل عادل امام

لا تجد له فيلما فيه شخص ملتحي الا لو كان ارهابيا او سئ الخلق

ونجد ايضا اذا قام اي متدين باي خطا ولو بسيط تقوم الدنيا وما تقعدش

ولو قام بمليون عمل جيد لا يذكر حتي اسمه

وكتير من المسلسلات نجد البطل صاحب القيم والاخلاق

لا يوجد ولا مشهد واحد يبين انه يصلي يذكي وكاننا بلد غير مسلمه

دي بس كانت بعض الخواطر قفزت في راسي عندما قرات الكتاب

بين الذكري والواقع

2007-06-09T11:16:00.001-07:00

ضحكت بمرح وهي تراقبه

وفجاه توقفت لتراه لاول مره من سنوات

وقفت تنظر اليه وينظر اليها وهم مبتسمين وعيونهم تتكلم

يااااااااه خالد ياتري عامل ايه دلوقتي؟

وهو ايضا يبتسم وهو ينظر اليه وعيونه تتكلم

اميره مش معقول الدنيا صغيره فاكره اول يوم اتقابلنا؟؟

فاكره في الجامعه في السنه الاولي كنت في شئون الطلبه بخلص ورق وفجاه جه واحد وسالني علي اللي محتاجاه وعرفت بعد كده انك رئيس اتحاد الطلبه وانك اكبر مني بسنتين وبعدها انا رحت بسرعه اشترك في الاتحاد

وانا اول ماشفتك محتاره وتايهه عرفت ان انتي حب حياتي وماترددتش اتعرف عليكي واول ما عرفت باشتراكك في الاتحاد كنت حاسس ان الدنيا كلها سعيده معايا

كانت احلي سنه في حياتي

واحمر وجهها خجلا عندما تذكرت

فاكر يوم ما صارحتني بحبك

فاتسعت ابتسامته

يومها كان وجهك كالشمس ساعه غروبها بوجه احمر في منتهي الجمال
وفي عينيكي كل الكلام الذي لم تسمعه اذناي

وعاد وجهها يبتسم ابتسامه حزينه وهي تتذكر

بعد تخرجك تقدمت الي والدي تطلب يدي ولكنه رفض بشده بسبب ظروفك الماديه
وانك في بدايه حياتك بعدها كرامتك لم تسمح لك حتي بالاتصال بي وانا تعمدت الانهماك في دراستي حتي تخرجت

وفجاه خرجت من عالم الذكريات بصوت يناديها

ماما يلا انا خلصت لعب عايز ايس كريم

حاضر حبيبي يلا

واحتضنت يد صغيرها ومشيت من جانبه وهي تنظر اليه وداعا

وهو بادلها نظره الوداع حينها نادت عليه

يلا يا حبيبي

ايه حبيبتي لقيتي اللي بتدوري عليه

لا بس قالولي انهم هيجيبوا قريب

طيب يلا انا عازمك علي الغدا

ضحكت وهي تقول

ربنا يخليك ليا

وفي بيت اميره عصرا
يفتح زوجها باب الشقه وينادي

اميره اميره

ايوه يا احمد ثواني بحضر الاكل

لا سيبي الاكل خمس دقايق وتعالي عايزك

حاضر ثواني

اغلقت اميره علي الطعام وذهبت لزوجها سريعا

خير يا احمد فيه ايه

اقعدي بس عايزك فين علي ؟

نايم بعد شقاوه الصبح هقوم اصحيه عشان نتغدي

لا استني اقعدي غمضي عينيك

فابتسمت

اغمض عينيا حاضر يا سيدي

واخرج من وراء ظهره باقه من الورد الابيض ومعها الشيكولاته الذي تعشقها

فتحي عينيكي

الله يا حبيبي جميل قوي وكمان شيكولاته ربنا يخليك ليا

ما تزعليش مني يا اميره انا اسف امبارح اتعصبت عليكي شويه لكن كانت اعصابي مضغوطه من الشغل

انا ما اقدرش ازعل منك ابدا

يعني بتحبيني

طبعا

يعني انا اللي كنتي دايما بتحلمي بيه

انت الواقع اللي اجمل من كل حلم وذكري وكمان بينا اجمل حقيقه علي ابننا

واحتضنها وهو يقول

ربنا يخليكي ليا اميرتي

ويخليك ليا يا زوجي وابو ابني و ....... حبيبي

عاش فقير ... ومات كافر

2007-06-02T12:33:00.000-07:00

السلام عليكم ورحمه الله وبركاته

بقالنا فتره كده بنسمع حوادث كتيره او كوارث

عن ناس فضلوا الانتحار والموت كافر علي انهم يعيشوا فقرا

ومنهم قتل اولاده وزجته لانه شايف انه لما يقتلهم من غير ذنب هيروحوا الجنه ويستريحوا من الفقر

انا مش عايزه اتكلم عن حرمانيه الانتحار

واني اقول انه مجنون لانه فكر انه يموت كافر لاي سبب

ده كله معروف

بس فيه سؤال محدد بيدور في دماغي

هو فيه ايه جديد حصل في مصر غير كل مفاهيمنا

ايه اللي حصل خلي نفسنا هينه علينا بالمقارنه مع شويه فلوس

هل مفهوم الفقر ده جديد علي مصر؟؟؟

ولا احنا اللي بقت احتياجتنا الاساسيه في زياده

واصبحنا نتصور ان كل شئ اساسي ومهم

ولا الاعلام

اللي اصبح بيضغط ع الشعب بالسلع استهلاكيه مستفزه

ومسلسلات وافلام

اصبحت فيها الفيلا والعربيه وكل الكماليات هي طبائع الامور

ولا طموحنا بقي اكبر من امكانيتنا

ولا احساسنا بالظلم في بلد المسئول فيها بيزود الموظف ربع جنيه

ويزود تمن السلعه جنيه

ولو شاطر حاول تعيش

ليه بقي قتل الروح سهل

ليه بقي ديننا اخر همنا

ما لانهايه

2007-05-31T13:01:00.000-07:00

Negmsoftwareالقصه دي ل
في قهوه كتكوت

وهي من اجمل واحب القصص الي قلبي
لانها تمثل الحلم لعلاقه جميله بين رجل وزوجته
يارب تعجبكم

ما لا نهايه

"قُلْ آمَنَّا بِاللهِ وَمَا أُنزِلَ عَلَيْنَا" .. "قُلْ آمَنَّا بِاللهِ وَمَا أُنزِلَ عَلَيْنَا"

"وَمَا أُنزِلَ عَلَى إِبْرَاهِيمَ"

قُلْ آمَنَّا بِاللهِ وَمَا أُنزِلَ عَلَيْنَا وَمَا أُنزِلَ عَلَى إِبْرَاهِيمَ" .. "عَلَى إِبْرَاهِيمَ"

يبدو إنك لم تحفظ جيدا

نعم نعم .. لم أكمل المراجعة صباحاً

نظرات الإعتراض فى عينيها

يا حبيبى حسب الجدول الذى وضعناه كان المفروض بنا أن نصل للجزء السابع .. ولازلنا حتى الأن فى الثالث

..يفرك عينيه بشئ من التعب

أعذرينى حبيبتى .. ولكنك تعرفين ضغط العمل

.....

ما هذا .. لماذا فتح التلفاز .. أنه ميعاد الحفظ

أمتلأ وجهها بالغضب

مباراة .. إذا لن نبتدى إلا بعد إنتهائها

وطبعا ستنتهى متأخرا .. ويتحجج بإحتياجه للنوم

وستضيع الساعة التى أقتنصها منه لنحفظ فيها القرآن

وتحول غضبها الى أسى حزين

.....

فى المسجد .. بعد الدرس الدينى

لأى جزء وصلتى يا كريمة

يتملكها إحساسها المرير بالأسى

للجزء الثالث

كل هذا ولازلت فى الجزء الثالث .. لماذا ؟؟

أنا أحفظ مع زوجى .. يشجعنى وأشجعه .. ولكنه كسول بعض الشئ

ما لك ومال زوجك .. لن ينفعك يوم القيامة .. أكملى حفظ وحدك وإذا أراد أن يٌكمل فلنفسه

نظرت حزينة لسجاد المسجد وهى تردد

!!..نعم لديك حق

.....

أنتهيت أخيرا من الطعام

كم الساعة الأن .. لايزال أمامه الكثير من الوقت حتى يصل

سأبدأ فى الجزء الرابع .. حالما ينتهى من الجزء الثالث

"……"

برهة من الصمت

يٌستحن أن أنتظره .. فاليوم سنكمل الجزء الثالث ونبدأ سويا فى الرابع

.....

أعددت لك غداءً ستأكل أصابعك ورائه

..وبدأ يتناولان الطعام

من الأفضل أن أذكره بأن اليوم هو ميعاد الحفظ .. حتى لا يفاجئ بعد الأكل

حبيبى أتذكر ما اليوم

نعم أنه السبت لماذا حبيبتى ؟؟

تصطنع المرح

- أنسيت .. أنه يوم الحفظ

يرد عليها فى حماس- نعم نعم .. ننتهى من الأكل ونبدأ على الفور

..حمدا لله .. لم يعارض اليوم

انتهي الغداء .. واتجه الى غرفة النوم

..تشده من ساعده وهى تردد فى دلال-

هيا لا تكن كسولا .. هيا لنبدأ حبيبتى .. أيمكننى إراحة جسدى ساعة واحدة ثم نبدأ

..ما هذا .. هل يحاول الهروب .. ولكنى سأبقى معه للنهاية

لا يوجد مشكلة .. خذ قسطك من النوم ثم نبدأ

أكثر من ساعتين ضاعتا .. ولازالت تنتظره

ها هو قد أستيقظ

لن أكون ثقيلة أكثر من ذلك .. وسأتركه يبدأ الطلب

..ما هذا .. أنه يفتح التلفاز

بدأ الغضب يتسرب الى عروقها .. تمالكت نفسها بصعوبة وأعادت قناع المرح

أنسيت أنه يوم حفظ القرآن حبيبى .. لقد وعدتنى أنك ستخلد ساعة للنوم ثم نبدأ

أوه.. كدت أنسى .. ولكن أتعرفى فيلم السهرة اليوم فيلم رائع .. لنؤجل الحفظ غدا .. أيمكنك مناولتى غطاء من الداخل فالجو بارد هنا

..تحولت عروقها الى مضخات بركانية .. وبدأ عقلها ينسحب من الموقف .. ليعلوا صوتها

أنتظرك من الأسبوع السابق لتأتى اليوم تقول لى فيلم السهرة .. إنها المرة الثالثة التى تخلف وعدك معى

وبدأت الهمهمات تخترق حديثها وهى تكمل

إذا حفظت فلنفسك .. لن تنفعنى بشئ .. ولكن الخطأ هو خطأى أنا .. ما لى أنا بك .. لماذا أعرقل نفسى بسببك لن تنفعنى يوم الحساب

وأتجهت مسرعة الى غرفة نومها تتساقط منها دموعها

وقدأقضب حاجبيه ينظر نحوها

حتى دخلت غرفتها فانهارت على سريرها وقد تحول غضبها الى سيل من الدموع

وبسرعة جلست على سريرها وأمسكت بالمصحف تبحث فيه عن صفحة وقوفها .. أخذت تقرأ وتقرأ .. وكلما قرأت إنهمرت دموعها أكثر ..ستحفظ بدونه .. لن تتنازل أكثر من ذلك .. ولكنها تخاف ..!!

فربما يكون حفظها لتلك الصفحة سبب فى التفرقة بينهما فى الأخرة ..!!أرجعت المصحف مكانه خوفا من أن يبتل بدموعها ..وتوقف السيل وهى تمسح وجهها

وبصوتها الذى لازال يحمل الكثير من الهمهمات تحدثت لنفسها

لقد وعدنى أن نكمل الحفظ غدا .. وأنا لن أيأس بإذن الله

فاتت فترة من الصمت أعادتها لحالتها الطبيعية

قامت وهى تردد

!!..لأناوله الغطاء .. فالجو بارداً عليه

هغيرها ...... هغيره

2007-05-27T12:06:00.000-07:00

هتجوزها واغيرها

هتجوزه واغيره

دائما وابدا عندنا شعور غريب اننا نقدر نغير اي انسان باشاره واحده مننا

نقوله اتغير هيتغير

نقوله ابقي الشخص اللي محتاجينه في حياتنا هيبقي

غريبه جدا تصورنا باننا نقدر نتحكم في اخلاق وطبايع من حولنا ليكونوا ما نريد

ونسينا ان ربنا سبحانه وتعالي خلق كل انسان بشكل مختلف

بحياه مختلفه

بطبايع وتفكير مختلف

كل انسان له بصمه خاصه به في كل شئ

يكتسبها مما وممن حوله

ولان مفيش اي حد بيعيش حياه حد

ماينفعش شخص يبقي غير نفسه

وحتي لو اتغير

هيتغير لان هو عايز يتغير

لانه حابب يتغير

لانه شايف انه لازم يتغير

مش لان غيره شايف كده

نغمه غريبه جدا موجوده بين الشباب والبنات دلوقتي

شاب يرتبط ببنت بعيد عنه تماما فكريا

ويمكن كان بينتقد تصرفاتها

لكنه ارتبط بيها لانها هتتغير

هو هغيرها

هو هيفصلها علي مقاسه بعد كده

بنت تقبل الارتباط بشخص لا يوافقها تماما

علي امل انها ستفعل المستحيل وهتغيره

ونسيب ان ده في المسلسلات والافلام وبس

وفي الاخر بقول لو فيه حد بيتغير عشان حد

ليه انت ماغيرتش نفسك عشان تتوافق مع الطرف التاني