Tuesday, September 11, 2007

كل رمضان وانتم بخير




كل رمضان وانتم بكل خير


حابه بس الفت نظركم لحاجه


هو ان كلنا بنبدا رمضان بهمه عاليه وبحماس للطاعه والعباده


والحماس ده بيقل شويه بشويه


وينتهي رمضان بهمه اقل مما بدانا بها



فمهم قوي ان احنا نجدد نيتنا من هدفنا من رمضان كل ليله

ونحاسب انفسنا علي افعالنا كل ليله

وننوي علو همتنا الليله القادمه عن الليله السابقه


وهذا حتي نضمن اعلي همه في العشر الاواخر وليس العكس


وكل عام وانتم بخير وهتوحشوني طيله هذا الشهر الكريم


وارجو من الجميع الاخذ بنصائح الاستاذ عصفور المدينه في نصيحه رمضان




واراكم بعد عيد الفطر باذن رب العالمين


واتمني للجميع رمضان افضل من رمضان السابق


وبلوغ ليله القدر يارب العالمين

Tuesday, September 4, 2007

حدث في مثل هذا اليوم




في مثل هذا اليوم من 23 سنه

كان يوم مولدي


ماما قالتلي انه كان يوم وقفه عرفه


احنا في العيله عندنا مش مهتمين قوي بالمناسبات اللي زي دي


يعني يبقي كويس قوي لو افتكر وقال كل سنه وانتي طيبه


وده مش منطلق اننا شايفين ده حرام

لا الحكايه ابسط


لان انا بابا الله يرحمه وماما ناس بسطاء جدا

يعني انا فاكره اننا لسه مكتشفين تاريخ ميلاد امي قريب جدا

لما وجدنا شهاده ميلادها في وسط الاوراق

وعرفنا انه شهر 2

رغم ان انا طول عمري اعرف انه شهر 6


المهم ان احنا اتعودنا علي كده

وماكنتش باخد بالي قوي

وممكن يفوت عيد ميلادي وافتكر بعدها بشويه


لما وصلت لاعدادي وثانوي

ابتديت اشوف ناس كتير

بتهتم بالمناسبات دي

وابتديت اكتشف ان فيه عيد جواز وناس كمان بتهتم بذكري الخطوبه

ده غير الفالنتين


بصراحه كنت بحس انه جميل ان اللي حواليك يفتكروك

ويقولو دعوه حلوه

ومش مهم الهديه بس احساس ان حد افتكر مناسبه خاصه بيك اكيد احساس جميل


مع الوقت ابتديت اعرف ان الحب والاهتمام بين الناس اكبر بكتير

من كلمه في مناسبه ايا كانت مهمه


يعني زي ماذكرت قبل كده

في عيلتنا الصغيره عمري ماشفت والدي الله يرحمه

بيجيب هديه لماما في اي مناسبه من المناسبات دي

لكن لما اشوف بابا الله يرحمه ازاي كان الشئ الوحيد اللي يزعله من اي حد قوي وينرفزه

ان ماما تكون زعلانه او شايله هم حاجه

يحاول علي قد مايقدر يحل اي مشكله عشان هي ماتشيلش هم

بيدور علي الشئ اللي يسعدها قوي ويعمله


ساعتها افهم ان الحب والاهتمام بين الزوج والزوجه اكبر من علبه حمرا في الفالنتين



لما اكون تعبانه واخويا الكبير عند حماته اللي يبعد بيتها عن بيتنا اكتر من ساعه ونص بالعربيه

وماما تتصل بيه يقولها انا جاي روحوا عند الدكتور وانا هحصلكوا

ويتصل بيا كل خمس دقايق علي الموبايل يعرف عملنا ايه


واول ماييجي عند الدكتور مراته تقولي كان بيسوق بسرعه وقلقان عليكي جدا

واول ماشافني ابتسم وقعد يهزر عشان ينسيني اي تعب


ساعتها اعرف ان رابطه الاخوه اكبر من اي كلمه في مناسبه


ارجع اقول انه جميل انه حد يفتكر مناسبه لشخص قريب منه

ويسعده انه فاكر ومهتم


لكن مش معني انه نسي انه غير مهتم

لان الاهتمام والحب اكبر بكتير من كلمه في اي مناسبه

Saturday, September 1, 2007

عدنا

اسفه عن انقطاعي كل الفتره دي
عن الكتابه وعن التعليقات
بس انا كنت متابعه بالقراءه معظم اللي اتكتب الفتره اللي فاتت
واكتشفت عوالم اخري في مدونات اخري
منها اللي صدمتني بجرئتها الزايده
ومنها اللي عجبني حماسها
وعجبتني قوي قوي بوستات الاستاذ عصفور المدينه
عن رمضان
وناويه اخد بنصيحته في تحضير برنامج مفصل لرمضان
للاستفاده القصوي في كل ثانيه في هذا الشهر الكريم
وكل سنه وانتم جميعا بخير وبافضل حال
ويكون رمضان السنه دي بدايه جديده لمجموعه من الطاعات
سبب غيابي الفتره اللي فاتت مجموعه من الظروف
منها عائليه ومنها نفسيه ومنها الكترونيه
واصعبها الظروف النفسيه
ودلوقتي بحاول اجمع نفسي وابنيها من الاول
وهستغل رمضان في ده ان شاء الله
وياريت تدعولي
انا حبيت اسلم عليكم الاول
واقولكم اتنظروني
مع بوستات جديده
ان شاء الله

Sunday, August 19, 2007

داري علي شمعتك تزيد





نجحت اوعي تقول او قول يعني الحمد لله


اتخطبتي اوعي تقولي او قولي عريس اي كلام


اتجوزتي اوعي تقولي او قولي بلا جواز بلا نيله


حامل اوعي تقولي او قولي ده انا تعبانه والحمل تاعبني وبموت


اشتغلتي اوعي تقولي او قولي ده الشغل مطلع عيني واشتمي في اصحاب الشغل


جبتي شقه جديده اوعي تقولي او قولي دي شقه في منطقه زباله ومش متشطبه ودفعت كل اللي حيلتي








وهكذا وهكذا وهكذا


تتفنن فتيات وسيدات المجتمع المصري بعدم وصول اي خبر سعيد لشخص اخر

حتي لو كان اقرب المقربين ليها


داري علي شمعتك تقيد

وعين الحسود فيها عود



وتبدا حاله الرعب والفزع ان حد يعرف سر القنبله الذريه

قصدي الفرحه الاسريه في اي بيت مصري


ولو حد عرف من بره وييجي يمسك حد من البيت يقرره


ويبقي البيت كله موصي ماتقولش لحد


وتبقي بين نارين

يا اما تقولي وتستحملي اللي هيحصلك في البيت

او كاتقوليش ويبقي شكلك وحش قوي قدام اللي بيسال


لان كده كده مفيش حاجه بتستخبي


وهو بيسال عشان يمتحنك خايف مني مش هتقول

ولا مش خايف



وتبدا معركتك داخليا اقول ولا ما اقولش وتبحثي عن اي جمله تجعل الاجابه عايمه

يعني لا تاكدي ولا تنفي

يعني الحمد لله ربنا يسهل ما اعرفش احتمال

كلام من هذذا النوع


ولما توصلي البيت بعد سؤال المقرراتي


يبدا السؤال طيب هو عرف منين

يا ساتر هو مين اللي قالها دي ؟؟


ويبدا الشك ينتشر في وسط الاسره

ياتري مين الخاين


اللي ممكن يكون من غير قصد وبحسن نيه قال

الويل له الويل له


وبعد ذلك يتحول كل اهل البيت الي خبثاء

يبحثون عن اجوبه جهنميه لكل سؤال بعد انتشار الخبر السعيد


وبهذا تتحول كل مناسبه سعيده الي حرب بارده

يبدا كل سائل ان يتمحص ويفهم اللي ورا السطور





وداري علي شمعتك تولع في البيت كله

Saturday, August 11, 2007

عبد الله


عبد الله
شخص غريب وحتي ما اعرفش ان كان عبد الله ده اسمه
ولا وصف يقوله علي نفسه فانا عبد الله

عبد الله شخص قوي البنيه

تعدي عمره الاربعين عاما

يمسك في يده عصا سميكه يستند بها رغم انه من الواضح انه لا يحتاج اليها

كثيف شعر الذقن والشارب

يرتدي جلباب طاقيه

يكلم كل الناس انا عبد الله

بحب الله وبحب الرسول

ربنا قال ان كاسيات عاريات يروحوا النار

شوفوا البنات دلوقتي عريانه

فين ربنا

واتكلم شويه عن قوم لوط وقوم موسي

وشعرت به كالببغاء سمع كام محاضره دينيه

وبيردد من كل محاضره كلمتين

وينتهي ان الناس تتاثر وتعطيله قرشين

ويستخدم هذا الكلام في حياته اليوميه يركب مواصلات يقول الكلمتين

وياخد القرشين

وطبعا السواق لازم يبقي عنده دم وماياخدش اجره

ولو صمم ياخد يبقي اي حد شهم من الركاب يدفع

لانه عبد الله

واصبح الدين هو وسيله عبد الله للشحاته

رغم انه طول بعرض بارتفاع

ولاننا شعب نموت في اللي يضحك علينا

هيفضل موجود عبد الله

ولنا الله

Tuesday, July 31, 2007

ماعلينا







ماعلينا




هو ان كل شئ يساوي لاشئ




هو ان تفقد قدرتك علي الدهشه رغم كل ما يحدث




هو شعار ما باليد حيله وادي الله وادي حكمته




هو ان تضرب كف بكف وبعدين تقول يلا قدر الله وماشاء فعل يعني هنعمل ايه




هو ان يكون بداخلك بركان من الكلام ووقت احتياجك لحرف تقوله تبحث عنه فلا تجده




هو عندما تكتشف ان كل ما حولك هو عباره عن فيلم سخيف وحتي ابطاله مش قادرين يكملوا الدور للنهايه




هو عندما تكتشف ان كل ما تملك عباره عن لسان كتير بيبقي اخرس مراعاه لكثير من القيود والتقاليد والعرف والجبن




هو ان تجد كل ماهو صحيح سلبي حركته بطيئه واخرس

وان تجد كل خطا ايجابي سريع وصوته عالي




هو ان تكتشف انك ضعيف ومقاومتك لكل شر داخلي وخارجي ضعيفه فتستسلم لشيطانك وشهواتك وانت بتبرر كل شئ بانك بشر وضعيف رغم ان هذه الكلمه حجه عليك وليس لك لان كل ضعيف لابد ان يتمسك بالقوي الرحيم لابد ان يعلم انه اصغر واضعف من ان يخالف امر ربه وحكمته




هو الاحساس بانعدام المسئوليه عند معظم الشباب والشابات




هو ان تري المصلحه وتبحث عن مستقبل من باب خلفي وتقول هي جت عليا




هو غياب الوسطيه اللي هي اساس اسلامنا الجميل وبقينا بين متشدد والمبسط لكل الامور




هو ان تكون القرابه وصله الدم حبر علي ورق بين اشخاص خايفين من بعض بدل ما يخافوا علي بعض

Wednesday, July 18, 2007

المنطقه الرماديه


السلام عليكم ورحمه الله وبركاته

انا شايفه الحياه ازاي

هحاول اصورلكوا الصوره وياريت اي حد شاطر في الجرافيكس يحاول ينفذها

شايفاها طريقين

طريق
مضئ بنور ابيض ساطع شايفاه كل الناس
وعارفه طريقه كويس وعارفه انه طريق الخير

الطريق اللي هيوصلهم للجنه

ولكن مش عارفين يوصلوا له
او مش كلهم بينجحوا انهم يوصلوا ليه



وطريق تاني مظلم

ملئ بكل الشهوات والمعاصي في اخره جهنم

كلنا عارفين انه طريق شر

وطريق ابليس وشياطينه

انه الطريق اللي بيوصل للجحيم

وبالرغم من كده مشدودين ليه

لاننا بشر انفسنا اماره بالسوء

وبنسمح للشياطين تضحك علينا



وبين الطريقين طريق باللون الرمادي

مزيج بين النور والظلام

يشتد سواده كلما اتجهنا الي طريق جهنم

ويشتد بياضه كلما اتجهنا الي طريق الجنه

واعتقد ان معظمنا واقفين في هذه المنطقه

نتشد شويه للطريق المظلم

وفجاه نفوق ونشوف النور ونحاول نرجع لطريق الجنه

وتجرنا انفسنا وشهواتها والشياطين الي الطريق المظلم مره اخري

وهكذا نتارجح بين النور والظلام دائما في هذه المنطقه


هي دي نظرتي للحياه عموما

ودائما بسال سؤال

كيف الخروج من المنطقه الرماديه
الي طريق الجنه ؟؟؟؟

ام اننا خلقنا لنحاول الوصول اليه

ولانعلم ابدا هل وصلنا

الا يوم القيامه

وساعتها سنحاسب علي مدي قربنا منه

وهل المسافه اللي وقفنا فيها لحظه وفاتنا اقرب لطريق الجنه او لطريق جهنم؟؟؟؟

هو السؤال اللي اجابته من خلال الحساب

يا اما تدخلنا الجنه او تدخلنا النار