عبد الله
شخص غريب وحتي ما اعرفش ان كان عبد الله ده اسمه
ولا وصف يقوله علي نفسه فانا عبد الله
عبد الله شخص قوي البنيه
تعدي عمره الاربعين عاما
يمسك في يده عصا سميكه يستند بها رغم انه من الواضح انه لا يحتاج اليها
كثيف شعر الذقن والشارب
يرتدي جلباب طاقيه
يكلم كل الناس انا عبد الله
بحب الله وبحب الرسول
ربنا قال ان كاسيات عاريات يروحوا النار
شوفوا البنات دلوقتي عريانه
فين ربنا
واتكلم شويه عن قوم لوط وقوم موسي
وشعرت به كالببغاء سمع كام محاضره دينيه
وبيردد من كل محاضره كلمتين
وينتهي ان الناس تتاثر وتعطيله قرشين
ويستخدم هذا الكلام في حياته اليوميه يركب مواصلات يقول الكلمتين
وياخد القرشين
وطبعا السواق لازم يبقي عنده دم وماياخدش اجره
ولو صمم ياخد يبقي اي حد شهم من الركاب يدفع
لانه عبد الله
واصبح الدين هو وسيله عبد الله للشحاته
رغم انه طول بعرض بارتفاع
ولاننا شعب نموت في اللي يضحك علينا
هيفضل موجود عبد الله
ولنا الله
14 comments:
لنا الله
السايس بتاع جراج بيقول لي أمس اطلع أهلا ياشيخ وقل اعملوا فسيرى الله عملكم
قلت له انت داخل الانتخابات ولا حاجة
وظهرت ظاهرة واحد ملتحي يقابل الملتحين ويطلب منهم لأنه مش لاقي عمل ومبتلى في عمله بسبب لحيته
قابلني واحد قلت له تعال معي سأذهب بك لشركة عند أصدقائي يريدون عمال وهم فعلا محتاجون فقال لي طيب اديني فلوس أفطر
!!!
بينى وبينك فى مصر هنا مش كل الناس بتاخد حقها لو اشتغلت
وناس كتير مظلومه
ففيه ناس بقى بتستسهل
وتفضل الشحاته كلها اهانه مش فيه فرق نهائى
ليكى عندى تاج
فكرتيني بشخص في يوم دخلت انا و صديقتي المسجد لنصلي فمع الاسف كان مكان السيدات في هذا المسجد داخل مكان الرجال
فوجدنا هذا الشخص يقرأ في المصحف وكان يرتدي مثل الشيوخ وواضح عليه علامات الصلاح فلم نلقي بالا له و مررنا لكي نصلي
و حينما فرغنا من صلاتنا و خرجنا من المسجد فاذا به يسير وراءنا حتي ارتابنا منه ثم اوقفنا فجأة ليقص علينا قصة مرضه و ابنته اللي مجبلهتش حاجة حلوة من زمان و كلام كتير لما بجد صعب عليا
لكن صحبتي لسة كانت حتقوله معاش يا عم ربنا يسهلك فبادر بقول جزاكي الله خيرا انا لا أسألكو الا اني قد وجدت عليكما علامات الصلاح و اني لا اسال اي حد و تركنا وذهب
حسيت بجد بتأنيب ضمير لاني مع الاسف من النوع اللي بيتأثر بالحاجات دي
فرجعت اليه سريعا و نلت منه دعوة اتمني ان يستجيب لها الله
و مر كام اسبوع و كانت الصاعقة انه يفعل ذلك مع اناس اخرون
فعرفت ان الموضة هي الشحاتة بالدين و لا حول و لا قوة الا بالله
عبد الله وامثاله من المتاجرين بالدين بقوا كتير جدا
بنشوف منهم كمانناس بالتلفزيون
مش شرط يكون بيتاجر بالدين علشان ياخد قرشين
احيانا يتاجر بالدين علشان يبقى حواليه اتباع ترضى جنون العظمه والانانية جواه وتحسسه ان شيخ كبير
عبد الله موجود فى كل مكان يا جنه
بس بالعكس كل اللى بيشحته دلوقتى تحسى انهم بيتاجره بالدين
والادعيه اللى بيقوله عملا على بطال
مش عارف والله اقول ايه
اللهم لا تؤاخذنا بما فعل السفاء منا
-------------------
على فكره يا جنه
مدونتك جميله
اخ عصفور المدينه
احنا ماشيين بمبدا ليه تدفع اكتر
لما ممكن تدفع اقل
يعني الشحات ليه يشتغل ويتعب
لما ممكن يكسب اكتر بالساهل
رفقه عمر
فعلا فيه محسوبيه وظلم وكوسه وباميه وكل الطبيخ
بس احنا كده بدل ما نحاول نرفع الظلم عنا بنظلم نفسنا اكتر
ولو كل مظلوم استسهل الشحاته
يبقي الشعب المصري كله هيبقي شحات:)
داعيه المستقبل
مفيش اكتر من الحكاوي والروايات والاشكال اللي موجوده للنصب
اخر موضه وصلت الاباء والامهات
بيطلعوا عيالهم العمارات
اطفال لا يتعدوا 5 سنوات
يخبطوا علي كل باب
كنسنا الشاره يا حجه
كنسنا الشارع يا بيه
ولا فيه شارع بيتكنس ولا حاجه
وبييجوا كل اسبوع
واللي يعيش ياما يشوف
الباحث عن الحقيقه
العيب مش ع الناس دي يا اخ باحث
اكتر من ان العيب علي القنوات والاماكن
اللي سمحت لناس بيدعوا العلم انهم يظهروا
وكل واحد حافظ كلمتين من محاضره بقي شيخ وداعي
اسلام
بالظبط عندك حق
كله عرف ان اكتر حاجه بترقق قلب الناس وهي الدين
وبيستخدموه بطريقتهم
اما بشكلهم او كلامهم
او الدعاء
وشكرا علي اطرائك علي المدونه
وهي جميله بتعليقاتكم
كنت قد سألت معظم الناس بخصوص هذا الموضوع
كانوا يجيبون أنهم لا يستطيعون أن يردوا السائل
لعله علي حق
لعله محتاج
وأنت لا تدري
ربما تيتطيع التثبت وهذا خير علاج
أن أستطعت
الطريقة الجديدة اللي بقابلها كثيراً جداً , هي من يريد اجرة المواصلات
ويتحجج بأنه فقد حافظته او أن أمواله نفدت
وأنه لا يملك حق المواصلات
الناس ديه مش بعرف أعمل معاها حاجة
ربما تكون محتاجه فعلاً
وربما أتعرض لنفس الموقف
عبد الله ممكن ميطونش مسلم اصلا
اخ بينو
تعليقك فكرني بسؤال سالته قبل كده
لو احنا ادينا صدقه لمن لا يستحق
هل يقع الذنب ع السائل فقط لانه تحري الكذب عليك
ام انها تقع ايضا علينا لاننا لابد قبل ان نعطي نتاكد من مدي حاجته وهل يوجد من يحتاج اكثر ام لا
اخ شرم
ممكن
ممكن جدا اي حاجه وكل حاجه
Post a Comment