Sunday, March 30, 2008

قــاعدة عـــرب





انا عادة مش بحب اسمع خطب السياسيين يعني اول مابسمع ايها الساده والسيدات والحضور الكريم بحس اننا في مسرحيه وكلهم ممثلين بيكدبوا وبيمثلوا علي بعض وعلي المتفرحين وكل واحد عارف ان التاني ممثل ودي كلها مسرحيه بس لازم يكملوا الدور للنهايه حتي لا تكون مؤامرات خلفيه ضده من وراء الكواليس وهذا بالنسبه لكل المناسبات ولكل السياسيين بلا اي استثناء لان السياسه مرادفها التمثيل وساعات تتحول تمثيل بلا ادني سياسه او هدف بس كله بيمثل علي كله وكله بيكذب علي كله فأول ما اسمع اول جمله في الخطاب اقول كذاب واقفل لكن يوم إفتتاح القمه العربيه الحاليه كنت في الشغل ولاني قاعده لوحدي بشغل الراديو وخصوصا إذاعة الشرق الاوسط لان المذيعين والبرامج دايما شغالين ففيه كلام جنبي مش منتبهه ايه اللي بيتقال صوت وخلاص وفجأه انقطع ارسال البرنامج لإذاعه خارجيه قلت خير وبعدها سمعت المذيعين بيتكلموا عن القمه العربيه في دمشق وبتوصف القاعه وبيتناقشوا هل هي جزر القمر (بضمه علي القاف) او القمر (بفتحه علي القاف)


وبدأوا بكلمة بشار الاسد وحواره كله كان علي لبنان وانه كان يتمني ان تأتي لبنان حتي يتوصلوا لتسويه بينهم علي اساس انهم هيصالحوا بعض في قاعدة العرب دي وكل رئيس يهدي النفوس بين البلدي ويقولوا ده احنا اخوات ومالناش غير بعض قومي ياسوريا بوسي راسها يلا يا لبنان خلاص حليب يا لبن وانهم ماعرفوش يعملوا ده الا في مؤتمر رسمي علشان يمسكوها من ودنها اللي بتوجها هه هتتصالحي ولا نفضحك ونقول مش راضيه ومابتسمعيش كلام اخواتك وانتهي الرئيس من كلمته



وجاء عمرو موسي وجاء خطابه في 8 نقط وهي طبعا مصايب الدول العربيه من فلسطين للبنان للعراق لعلاقات الدول العربيه بعضها ببعض والازمات الداخليه والخارجيه للبنان بس نسي يقول انها رغم كل هذه المشاكل لسه بتتمتع بروح المرح والهيافه ولاتزال ستار اكاديمي للموسم الخامس والسنه الخامسه علي التوالي علي ارض لبنان وانهي كلمته بان هذه النقاط مطروحه من القمه الماضيه ولم تحل الي الان ولن تحل في المستقبل القريب ولا البعيد وطبعا مش نسي يشيد بجهود جامعة الدول العربيه وفضلها العظيم علي كافة الدول يعني ان خير الجامعه علي الدول ومغطيهم ورغم هذه الجهود الكبيره برضه مغيش تقدم ولا مشكله اتحلت كان ناقص يقول انا مش عارف اعمل ايه انا تعبت وفاض بيا ومفيش فايده فيكو انتو عرب هتفضلوا زي ما انتوا


وجاء معمر القذافي وجاءت كلمته بمنتهي الصراحه وجاب من الاخر انه مفيش فايده ولسان حاله بيقول انا مش عارف انتوا جايين ليه احنا مش بنتفق ولا هنتفق وده كله كلام فارغ احنا مش بنحب بعض ولا ناويين فمفيش فايده


ولغاية هنا والاذاعه الخارجيه في الشرق الاوسط خلصت وبعد ماسمعت كل الخطب دي عرفت اننا كسياسيين عرب فاشلين حتي في التمثيل ومالناش غير ربنا لانه علي راي القذافي مفيش فايده

7 comments:

A.SAMIR said...

اجدع واحد في القعدة الحلوة دي هو الاخ العقيد
الراجال جاب من الاخر والهدف الاساسي من القمة انه يهزأهم
تحياتي

عاشقه الفردوس said...

الله اكبر

اذيك ياجنا

انتي بتختفي تختفي وترجعيلنا بموضوع نار

تعرفي انا حتي مبصتش ع المؤتمر
قرف
ضحك ع الدقون زي ماقولتي


استهبال ممكن

تخلف وعبط ماشي

قولي اللي تقوليه ويبقي برده ماوفتيش حقهم


بصي

القذافي ده جدع وربنا

مبيمثلش وبيجيب من الاخر زي ماقولتي
ربنا يريحنا منهم بقي

عمر المصرى said...

السلام عليكم
للأسف نفس الحوار بيتكرر كل قمة
كان فى حوار أحمد منصور مع وزير التموين المصرىا لسابق قال إن فى إجتماع عربى سنة 1982 اتخذورا 153 قرار وساسية لتحسين وتحقيق الإكتفاء الذاتى للدول العربيه ولم يطبق أى قرار إلى الأن بعد 25 سنة
ودايما ده حال العرب
الله أهدهم وأصلح حالهم

رفقة عمر said...

انا جاىه اسلم علكى واطمن
انا زهقت من القاعدة العربىه دى
مالهاش لازمه خااااااااالص
دول بتفسحوا وىاكلوا وبس

Dumuro said...
This comment has been removed by a blog administrator.
الباحث عن الحقيقة said...

على اخر الزمن بقينا ناخد الكلمات المأثورة من معمر القذافي
فعلا مفيش فايده في العرب
دي مش اجتماعت قمة ..دي حفلة عصير
كل وفد رايح يطفح زجاجة العصير اللى قدامه

Kazilar said...

See Please Here