الدكتوره ما عليها قررت تكون صاحبه السبق في اول تاج في المدونه
يعني التاج ده ما عليني تماما
المهم انا عايزه اعرف انا هجبت كام بعد ما اجاوب درجه من 100 مثلا
واقسم بالله العظيم اني ساكون صريحه والله علي ما اقول شهيد
بسم الله نبدا
انت مين ؟؟
(جنه(بس ده مش اسمي الحقيقي
مين اكتر ست اشخاص بتحبهم ؟؟؟
اشمعني سته صحيح انا هعتبر العيله كلها فرد واحد واصحابي وبنات خالتي كلهم دول بقي يعملوا شعب كفايه كده
هل انت سعيد ؟؟
حاليا الحمد لله ساعات بيمر عليا فترات زي اي انسان ببقي مش طايقه نفسي وانا الكابه عندي بزياده حبتين بس دائما فتره الاكتئاب دي بتيجي لما ببعد شويه بشويه عن ربنا يعني الشيطان يضحك عليا شويه ابعد ما احسش بالرضا اكتئب احاول اتغلب عليه برجع لطبيعتي وهكذا
لو اجتمعت مع حسنى مبارك فى مكان واحد هتعمل ايه ؟
انا نفسي اشوفه وجها لوجه عشان اساله سؤال واحد بيدور في دماغي كتير هو ازاي بينام بالليل منين بيجيب الامان وراحه الضمير اللي يخلوه ينام؟؟؟
لو معايا مليون و نص اعمل ايه ؟؟؟
اول حاجه هطلع ربع مليون لله بس مش في مكان واحد في اوجه كتير
تاني حاجه هشتري شقه لاخواتي الاتنين الصبيان وهدي مبلغ لاختي
والباقي هجيب هعمل مشروع بتمناه وهو مطبعه ومكتبه
ولو فضل فلوس هجيب عربيه
يعني هجيب حاجات كتير هاتيهم انتي بس وانا هتصرف ما تقلقيش :)
بتحب مصر ؟؟
كتيييير بحس اني بكرهها بسبب كوارث او مصايب بتحصل واقول اول ما تيجي اي فرصه اني اهاجر همشي وانا مبسوطه ومش هرجع تاني لكن اول ما انزل الشارع وابص في عين الناس الطيبه احس بالروح المصريه اللي صدقيني مش موجوده في اي بلد في العالم حتي البلاد العربيه وده بشهاده شهود اول ما افتح الحنفيه واشرب ميتها حتي لو كان فيها تلوث اقول الحمد لله اول ما اسمع اغنيه عن مصر بحس قلبي فرحان واقول بكره احسن واعرف واتاكد اني بعشق كل شئ في البلد دي رغم كل شئ
انت مسلم ؟؟
الحمد لله رب العالمين مسلمه
ودي نعمه كبيييييره كتييييير مش حاسس بيها لاننا اتولدنا مسلمين
وتحس الفرق ده لما تشوف واحد اتولد مسلم وواحد اسلم بعد ما كبر التاني بيحس بالنعمه وبيشكر ربنا كل يوم عليها
اما الاولاني مش حاسس بيها
ليه ؟؟
كنت زمان زي ما قلت في الاجابه اللي فاتت مسلمه لان في شهاده الميلاد مكتوب الديانه مسلمه وده طبعا تبعا لان والدي ووالدتي مسلمين لكن الحمد لله دلوقتي بقرا وبفهم وبسمع كتير عن ماهيه الاسلام وازاي رب العالمين قال
(لسيدنا محمد في الايه الكريمه ( اليوم اكملت لكم دينكم واتممت عليكم نعمتي ورضيت لكم الاسلام دينا
صدق الله العظيم
الايه دي اعظم دليا علي عظمه هذا الدين وكفايه ان رب العالمين ارتضي لنا ان نكون مسلمين
مين اكتر شخصية متقدرش تستغنى عنها ؟؟؟
والدتي
ايه اكتر موقف محرج ؟؟
مش فاكره موقف محدد حاليا بس انا شخصيه نسايه جدا وكتييييير شخصيات بيكلموني واقعد اتكلم معاهم وانا مش فاكره مين وبيتكلموا معايا بالطريقه اني اعرفهم كويس وببقي نفسي اسال انت مين وبتكسف من نسياني ده دايما
الامنية اللى اتمنا تحقيقها ؟؟
نفسي قوي واتمني ان ربنا سبحانه وتعالي ينور لي الطريق اللي اقدر بيه ادخل ولو جزء من السعاده علي كل بيت مسلم
ونفسي يكون بابا الله يرحمه توفي وهو راض عني
والامنيات كتير بس كفايه دول دلوقتي
التاج باه يتمرر لمين ؟؟؟؟
لمدونه نويت اكوم مستقبلي بتاعت امنيه
ومدونه خليك في حالك لرضوي
10 comments:
هو فيه طريقتين لما علينا
طريقة إمبراطورية أرض الرغي ودي الإجابات بتبقى طويييييييييلة
وفيه طريقة الدكتورة ما علينا .. أرض ما قل ودل وانجازكو ..
كده واضح إن حضرتك تنتمي لمدرسة الدكتورة
:)
عموما إجابتك جميلة وعجبني إجابة سؤال المليون ونص ..
أشم رائحة الصدق
:)
هما ماعلينا مش حيخلصوا
حتخلوني افكر أعمل ماعلينا أنا كمان
جميل يا جنتى
بس كده تنسينى فى موضوع المليون ونص:(
:D
قرينتى فرحت بيكى اوى لما لقيت الاجلبات ما قل و دل
اجاباتك رائعة
ودا شرف انى اكون اول واحد ابعتلك تاج
باشمهندس ما علينا
مافيش احسن من ما قل ودل
ورغم احنا بنات بس مش رغايين
نورت يا باشمهندس
اخ بينو
كويس بس يارب ما تكونش ريحه شياط في البيت
:)
توكل علي الله واعمل
وماعلينا تتشرف بوجودك معاهم
موني
انا اقدر انساكي يا موني
ليكي عندي جنيه وربع بحالهم
بس انتي بس عليكي وعلي الدكتوره هي اللي بتصرف الفلوس
:)
اخ علاء
قريت يا اخ علاء وسجلت رايي
بس واضح اني جايه متاخره
دكتوره ما علينا
الشرف ليا يا احسن قرينه
شفتي خلاص انا كده انضميت لحزب ما قل ودل معاكي
:)
مدونة جميلة جدا وشيك جدا وليا عودة
إن شاء الله يا أخت جنة لرد على
المواضيع الجميلة واستأذنك فى إضافة
المدونة عندى
Post a Comment